Msiba AICC James Mgani
Afariki Dunia...

Mkurugenzi wa Idara ya Mikutano na Masoko wa Kituo cha Mikutano cha Kimataifa(AICC) Bwana James Mwifunyi Natthan Mgani amefariki dunia.Bwana Mgani alifariki dunia siku ya Jumamosi tarehe 16 Agosti,2007 katika hospitali ya AICC kutokana na ugonjwa wa Ini.


Hali ya afya yake ilianza kubadilika mara tu baada ya mkutano wa Leon Sullivan,ndipo akapelekwa India kwa matibabu zaidi.Alirudi Arusha kabla ya kufikwa na mauti.Marehemu alizaliwa katika Kijiji cha Kasanga Wilaya Mufindi tarehe 17 Julai 1959.Alipata elimu yake ya msingi katika shule ya Kasanga kabla hajajiunga na Sekondari ya Forodhani ya mjini Dar es Saaam.


Baadaye shule ya Sekondari ya Mirambo Tabora alikomaliza kidato cha sita mwaka 1981.Mnamo mwaka 1987 alihitimu shahada ya kwanza kwenye Chuo Kikuu cha Dar es Salaam na baadaye kupata shahada ya pili mwaka 1997.


Marehemu alijiunga na AICC mwaka 1990 kama Afisa wa Kitengo cha Utalii. Kabla ya kifo chake Bwana Mgani aliwahi kushika nyadhifa mbali mbali katika shirika hadi kufikia cheo cha Mkurugenzi wa Mikutano na Masoko Ndugu Mgani alihusika katika kutoa mchango mkubwa katika sekta nzima ya Utalii wa Mikutano Tanzania na katika uhamasishaji wa kuanzishwa kwa kituo kikubwa cha mikutano(Convention Centre)hapa Tanzania.