Mzungu wa mgodi wa Geita kortini kwa kumpiga `mswahili`

Hatimaye Raia wa Afrika kusini, Manie Fourie (47) anayefanya kazi kwenye mgodi wa dhahabu wa Geita amefikishwa katika mahakama ya wilaya ya Geita mkoani Mwanza akikabiliwa na shtaka la shambulio la kudhuru mwili.

Mzungu huyo anadaiwa kumshambulia David Semhando ambaye ni mfanyakazi mwenzake, wakiwa kazini.

Kesi ya Manie ilisomwa jana katika mahakama ya wilaya iliyoketi mbele ya Kaimu hakimu wa mahakama hiyo, Bw. Juma Kibari.

Hata hivyo, Manie hakutakiwa kujibu lolote kutokana na hakimu aliyeahirisha kesi hiyo kutokuwa na mamlaka ya kuisikiliza hadi pale hakimu wa mahakama ya wilaya atakaporejea kutoka safarini.

Waendesha mashtaka, Inspekta msaidizi Igansi Kapira na Sajenti Tom Mboya walidai mbele ya hakimu Kibari kuwa mshtakiwa bila halali, katika tukio la Machi 26, mchana katika eneo la mgodi wa dhahabu wa Geita alimpiga mlalamikaji kinyume cha sheria.

Baada ya Manie kusomewa mashtaka na kutotatakiwa kujibu lolote, Hakimu Kibari aliridhia ombi la dhamana kwa mshtakiwa baada ya kutimiza masharti.

Masharti ya dhamana yake ilikuwa ni kusaini bondi ya shilingi 100,000 na mdhamini kuhakikisha anamleta mshtakiwa siku ya kesi.

Kesi hiyo ambayo imegeuka kivutio kikubwa wilayani hapa ilihudhuriwa na watu wengi jana wanaotaka kujua hatma ya Mzungu huyo.

Habari nje ya mahakama zilisema kuwa mlalamikaji ambaye alipigwa na mshitakiwa katika eneo la kazi ndiye aliyesimamishwa kazi huku `mpigaji` akiendelea kupeta, hali ambayo inaleta dhana ya ubaguzi ambayo imekuwa ikilalamikiwa sana katika mgodi huo.