`Itungwe sheria ya kuwalinda watoto kuingiliwa na wanyama`

Kituo cha Sheria na Haki za Binadamu (LHRC) cha jijini Dar es Salaam, kimeitaka serikali itunge sheria itakayosimamia maslahi ya watoto dhidi ya vitendo vya unyanyasaji ukiwemo wa kuingiliwa na wanyama.

Hayo yamo kwenye taarifa ya kituo hicho iliyotolewa na Mkurugenzi Mtendaji Bi. Helen Kijo-Bisimba kwa vyombo vya habari jana.

Alitoa kauli hiyo kufuatia kitendo cha kikatili kilichofanywa na wafanyakazi wa kampuni ya Barrick Gold ya Mwanza cha kumlazimisha mtoto wa miaka 13 kunajisiwa na mbwa katika mkasa uliotokea wilayani Sengerema hivi karibuni.

Alisema mbali na kumdhalilisha mtoto, kitendo hicho ni kinyume cha sheria na haki za binadamu.

Alisema ukatili dhidi ya watoto umekuwa ukiongezeka na kwamba njia ya kuvikomesha ni kutunga sheria itakayowalinda watoto.

``Ukatili huu wa mtoto wa Sengerema ni sehemu ndogo kabisa ya matatizo yanayowakumba watoto wa Kitanzania kila leo, tunadhani kwamba ipo haja ya serikali kutekeleza mapendekezo yetu ya muda mrefu ya kutaka sheria moja ya watoto itakayoondoa migongano ya kisheria pindi watakapopata matatizo katika jamii zao,`` alisema katika taarifa yake.

Alifafanua kuwa jambo hilo linatakiwa lishughulikiwe kwa kuzingatia uzito wake kwa kuhakikisha kwamba watuhumiwa wote wanachukuliwa hatua za kisheria.

``Tunaomba sana wahusika wa kitendo hiki wafikishwe mahakamani haraka iwezekavyo na kwa njia yoyote ile kusifanyike mchezo mchafu wa kupindisha sheria na haki kinyume cha taratibu zilizopo,`` alisema.