Uingereza yatangaza adhabu kali kwa waomba viza `feki`

Uingereza imetangaza adhabu ya kuwazuia kwa miaka 10 kutoingia nchini humo, raia wa kigeni wakiwamo Watanzania, watakaobainika kuwasilisha vielelezo bandia katika mchakato wa kuomba viza.

Ofisa Habari wa ubalozi wa Uingereza nchini, Bw. John Bradshaw, aliyasema hayo jana, alipokuwa akizungumza na waandishi wa habari jijini Dar es Salaam.

Bw. Bradshaw, alisema hatua hiyo imechukuliwa ili kuwadhibiti watu wanaoingia nchini mwao kinyume cha taratibu.

Kwa mujibu wa Bw. Brandshaw, kumekuwapo ongezeko la vitendo vya udanganyifu na kughushi nyaraka zinazotumika kwa ajili ya kuomba viza ili kuingia Uingereza.

Alitoa mfano wa nyaraka hizo kuwa ni taarifa ya fedha kutoka benki, ambapo wahusika walibainika kuzinunua kwa watu wanaowajua.

Alisema ili kufanikisha utekelezaji wa hatua hiyo, nchi yake itasambaza taarifa za watu hao kwa balozi za mataifa mengine ya Umoja wa Ulaya, ili kuepusha uwezekano wa watu hao kuingia Uingereza kupitia katika nchi hizo.

Bw. Bradshaw, alisema Uingereza imegundua kuwepo vitendo vya udanganyifu kwa watu wanaoomba viza na wale waliopo nchini humo.

Alisema zoezi la kubaini uhalali wa viza zilizotolewa, litafanyika ili kuwaadhibu watakaobainika, wakiwamo wale wanaoishi, kufanya biashara, kusoma ama watalii waliopo nchini humo.

Alisema udhibiti wa vielelezo bandia kwa wanaoomba viza, utafanikiwa kutokana na Uingereza kubadili mfumo wa mchakato kwa waombaji.

Alisema, hivi sasa maombi yote yatakusanywa jijini Dar es Salaam na kusafirishwa kwa njia ya kielektroniki hadi jijini London Uingereza, kwa ajili ya kuzichuja.

Kutokana na hali hiyo, maombi ya viza hayawezi kushughulikiwa kwa siku moja, kama ilivyokuwa awali.

``Tutayapeleka maombi yote London ili yapitiwe na kuchujwa, kisha kurejeshwa hapa, hivyo hatutakuwa na utoaji wa viza za dharura kwa siku moja,`` alisema.

Bw. Brandshaw, aliwataka watu wanaoomba viza za kuingia nchini humo kutuma maombi yao takribani wiki tatu kabla ya kusafiri, ili kuepuka usumbufu unaoweza kutokea.

Pia alisema kwa watu wanaoingia nchini humo kwa shughuli za muda mrefu ama mara kwa mara, wanapaswa kuomba viza zinazodumu miaka mingi.

Bw. Bradshaw, alisema kwa mujibu wa takwimu zilizopo, watu 462,556 kutoka nchi mbalimbali duniani, waliomba viza za kuingia Uingereza kwa mwaka 2007/2008, ambapo asilimia 17 ya maombi hayo yalikataliwa.

Alisema hapa nchini, takribani Watanzania 8,000 wanaomba viza za kuingia Uingereza kila mwaka, huku asilimia 17 ya maombi hayo yakikataliwa.

Hata hivyo, alisema kukataliwa kwa maombi hayo, si tafsiri ya kuhusika na vitendo vya udanganyifu na kughushi.

Alisema kiwango cha adhabu ya kufungiwa miaka 10 kutoingia Uingereza ni kubwa, lakini kitatekelezwa baada kufanyika uchunguzi wa kina na kubaini sababu ya msingi katika kufikia hatua hiyo.