Reli Sasa Mambo Safii..

** Serikali Yaikopesha (TRL) zaidi ya Sh3.6 bn kuongeza
mishahara


Waziri Mkuu Mh. Mizengo Pinda akisindikizwa na Waziri wa kazi,ajira na maendeleo ya vijana Juma Kapuya,baada ya kuzungumza na wafanyakazi wa shirika la reli Tanzania (TRL)leo jijini dar es salaam,wa tatu kutoka kulia ni mjumbe wa Bodi ya Shirika la Reli Nchini (TRL) ambaye pia ni mbunge wa Tabora Mjini,Siraju Kaboyonga .
----------
HATIMAYE Serikali imeingilia kati mgomo wa wafanyakazi wa Kampuni ya Reli nchini (TRL), uliosababisha kusitishwa kwa huduma za usafirishaji wa reli ya kati baada ya kuikopesha kampuni hiyo kiasi cha Sh 3.6 bilioni kwa ajili ya kuongeza mishahara ya wafanyakazi wake.
Uamuzi huo wa serikali,umewafurahisha wafanyakazi hao na kutangaza kusitisha mgomo wao mara moja na kurudi kazini baada ya madai yao ya kutaka kulipwa mshahara wa Sh 160,000 kwa kima cha chini kupatiwa ufumbuzi.Akizungumza na wafanyakazi hao kwenye makao makuu ya kituo cha reli cha kampuni hiyo jijini Dar es Salaam jana, Waziri Mkuu, Mizengo Pinda, alisema serikali imelikopesha zaidi ya Sh3.6 bilioni ili liweze kuwalipa wafanyakazi hao mishahara hiyo mipya kwa kipindi cha miezi mitano.