Picha juu ni Wana apolo wakiwa wamejipumzisha baada ya kazi ngumu ya kuokoa maiti zilizofukiwa kwenye mikodi mererani hivi karibuni...

Picha juu ni Wana apolo wakiwa wamejipumzisha baada ya kazi ngumu ya kuokoa maiti zilizofukiwa kwenye mikodi mererani hivi karibuni...

------------------
SERIKALI imesimamisha malipo ya posho kwa Polisi na maofisa wengine wanaoshughulikia masuala ya uopoaji maiti katika migodi ya Mererani baada ya kutokea malalamiko kwamba si wote wanaostahili ujira huo wanaolipwa. “Kuanzia sasa nimesimamisha malipo yote,iwe kwa polisi na wajumbe wa kamati kwa kuwa fedha zilizopo haziwezi kukidhi mahitaji yaliyopo kwani mahitaji ni makubwa na pesa zilizopo ni kidogo,’’ alisema Mkuu wa Mkoa wa Manyara Henri Shekifu jana.
Shekifu alitoa agizo hilo baada ya kusikika kwa malalamiko kutoka kwa wanajeshi waliokuwa wakipinga polisi kulipwa posho wakati wao hawalipwi chochote, huku wote wakishughulikia suala moja la kusimamia uopoaji wa maiti za watu waliokufa kutokana na mafuriko yaliyoikumba migodi hiyo siku tisa zilizopita. Wakati kukiwa na malalamiko hayo ya posho,hali si nzuri katika eneo kunakofanyika kazi ya uopoaji kutokana na kuendelea kuchafuka kwa hali ya hewa na kukosekana kwa mahitaji muhimu kwa ajili ya waokoaji, ikiwamo hata maji safi na salama ya kunywa.
Habari za uhakika zilizothibitishwa zilieleza kuwa polisi 35 wa Kikosi cha Kutuliza Ghasia (FFU) walioko hapa na wa kituo kidogo cha Mererani walilipwa kila mmoja Sh 30,000 kila siku kwa siku nne walizokuwa lindoni na kusababisha mzozo. Vyanzo vya habari viliendelea kueleza kuwa polisi walilipwa Sh milioni 4.2 kwa siku hizo wakati askari 23 wa Jeshi la Ulinzi la Wananchi Tanzania (JWTZ) hawajalipwa. Habari nyingine zilidai kuwa malipo hayo yalipingwa na wanajeshi kwa madai kuwa si vema polisi kulipwa posho kwani ni wajibu wao kulinda usalama na kuwalipa posho ni kinyume na maadili ya kikazi kwa kuwa wanalipwa mishahara.
Hata hivyo bado haijaeleweka kama wajumbe 10 wa Kamati ya Maafa iliyoundwa na Serikali wanalipwa kiasi gani wanapokuwa eneo la maafa. Shekifu alisema kuwa serikali imetoa kiasi cha Sh milioni 49.9 kwa ajili ya shughuli za uopoaji na mahitaji mengine na wadau wamechangia kiasi kilichobaki lakini fedha hizo hazitoshi.
Alisema kwa kila mwili unaotolewa katika mgodi Serikali hutoa Sh 200,000 kama pole na kwa shughuli nyingine za mazishi na maziko. Kwa mujibu wa watu mbalimbali waliohojiwa katika eneo la tukio, hofu iliyopo ni kwamba kama Kamati ya Maafa haitafanya shughuli zake kwa uangalifu, kuna hatari kwamba fedha zilizotolewa na Serikali na michango ya wadau wengine inayofikia Sh milioni 100 zikamalizika kabla kazi ya uopoaji maiti kumalizika.
“Ni bora fedha hizo zikatumika kwa kazi ya uokoaji tu na hao watumishi wa Serikali wadai posho zao kwa kufuata taratibu zao baada ya suala hili kukamilika,” alisema mdau mmoja aliyekuwa hapo ambaye hakutaka jina lake litajwe.Source Habarileo.