Na Joseph Mwendapole
Kamati ya Bunge ya Miundombinu, imesema haimjui mzawa anayemiliki asilimia 30 ya hisa za kitengo cha kupakia na kupakua kontena katika Bandari ya Dar es Salaam (TICTS).
Mwenyekiti wa kamati hiyo, Bw. Mohamed Misanga, aliwaambia waandishi wa habari kuwa wanachojua ni kwamba wenye kampuni hiyo wanamiliki asilimia 70 wakati mzawa mmoja anamiliki asilimia 30.
Alisema kamati hiyo imeiagiza serikali ifanye haraka kupitia upya mkataba wa TICTS ili kujua sababu za kusuasua kwake.
Hata hivyo, Waziri wa Nishati na Madini, Bw. Nazir Karamagi aliyejiuzulu wadhifa wake kwa tuhuma za mkataba tata wa Richmond amekuwa akihusishwa na umiliki wa TICTS.
Karamagi ni mwenyekiti wa shirika la TICTS duniani na hajawahi kuwa wazi kuzungumzia matatizo ya mlundikano wa bidhaa bandarini na mkataba wa kampuni hiyo na Mamlaka ya Bandari Tanzania (TPA).
Bw. Misanga alisema tatizo la ucheleweshaji mizigo bandarini pia limekuwa likisababishwa na uzembe wa kushughulikia nyaraka unaofanywa na Mamlaka ya Mapato Nchini (TRA).
Alisema hata mgogoro wa kampuni ya Reli TRL umekuwa ukichangia kwa kiasi kikubwa shehena kulundikana bandarini.
Alisema kamati imeiagiza serikali kusimamia suala hilo ili kuhakikisha mgogoro huo unamalizika haraka.
``Tutafuatilia kwa karibu kujua kinachoendelea, tumeagiza mazungumzo kati ya serikali na wafanyakazi yamalizike mapema ili shughuli ziendelee watu wasiteseke,`` alisema.
Waandishi wa habari walikuwa na shauku ya kujua mmiliki ya hisa hizo baada ya wabunge kulalamikia utendaji wa TICTS.
Mbunge wa Rorya (CCM), Profesa Philemon Sarungi alihoji vigezo vilivyotumika kuipa kazi TICTS, wakati kuna makampuni mengi ambayo yangeweza kufanyakazi hiyo kwa ufanisi.
Aidha, alihoji pia iwapo Mamlaka ya Bandari nchini TPA, itakuwa na uwezo wa kufanya zinazofanywa na TICTS iwapo mkataba utasitishwa.
Mbunge wa Same Mshariki (CCM), Bi. Anne Kilango alisema kampuni mama ya TICTS inafanya vizuri sehemu mbalimbali duniani lakini inashangaza kuona inafanya vibaya hapa Tanzania.
No comments:
Post a Comment