Yataka Moyo Na Maarifa!

Leo asubuhi nimeshuhudia maji ya mvua yaliyofurika katika sehemu ya barabara ya Umoja Wa Mataifa Dar. Huu ni uzembe wa uongozi wa Jiji, ni uzembe mkubwa na aibu kwa nchi. Ikumbukwe, kuwa Dar ndio sura ya nchi. Kwa staili hii ya kutokujali kuzibua mifereji na kuacha mashimo ya barabarani hatuhitaji Sheikh Yahya Hussein atutabirie kuwa mvua za masika za mwaka kesho zitasababisha mafuriko makubwa na watu kukosa makazi katika baadhi ya sehemu za jiji la Dar. Kama ni hivyo kila mtu anaweza kuwa mtabiri! Mimi na wanafunzi wenzangu wa tambaza tumepita kwa miguu eneo hili katika misimu minne ya mvua za masika kuanzia 1983-87. Sijawahi kushuhudia maji yakijaa katika barabara hii ya Umoja wa Mataifa. Hiki ni kielelezo kuwa walau viongozi wa jiji wakati huo walijaribu kufanya kazi yao pamoja na kuwa na mapato kidogo. Hawa wa sasa hawana sababu, waifanye kazi ya kuzibua mifereji na kukarabati barabara au watuache tuendelee kuwasakama.